Profile

BFR – Berliku Fanu Rai “Studio Gravasaun Muzika, kursu muzika, Sound Engineering” Fatin ba kursu Muzika nian, Sentru Muzika no Sound Engineering

BACKGROUND ORGANIZASAUN

BFR nuudar sentru ba kolaborasaun arte, liu-liu muzika, hari’i iha Metiaut Díli, iha Janeiru 2010 ho Fundu husi Eduardo Soares (muziku no konpozitor, peskizador) no nia belun Soni Wibisono (Toka-dor, konpozitor, sound engineer no matenek nain iha gravasaun muzika, mixing no mastering). BFR simu mos fundu ba prosesu estabelesimentu studio nian husi INSIGHT, organizasaun Timor-oan nian nebe servisu iha área peskiza ba asuntu sosio-politika no ekonomia. INSIGHT konpostu husi Timor oan nain 2, hari iha tinan 2005, iha Dili.

Ho studio gravasaun ba muzika no vídeo nian nebe nia iha, BFR hakarak organiza atividade muzika nian nebe bele lori muziku sira hamutuk ho halo eventu muzikal nebe bele kontribui ba paz, estabilidade no dezenvolvimentu humana. Dadaun ne BFR sei organiza atividade festival muzika ida ho naran Maliana Rock Festval. Festival ne’e sei involve Banda 10 nebe mai husi distritu hirak iha Timor laran. Ba oin BFR hakarak atu ha-luan ninia servisu iha área muzika, nebe bele posibiliza foin-sae sira sai matenek iha muzika no instrumentu muzikal nian, liu-liu ba hirak nebe mak hakarak desenvolve sira nia talentu iha instrumentu muzika, no sound engineering. BFR iha ona planu atu hahu fo kursu muzika iha vocal, viola [klasiku no eletriku], piano, drum, violino, cello nst; depende mos ba necessidade nebe mundu muzika iha Timor-Leste husu.

BFR NIA FI’AR

Muzika iha kbiit psikolojia nebe bele halo knaar ida nebe nonok. Nia impaktu ha-kbiit  emar nia matenek, ha-kbiit skill ema ida-idak nian, ha-da’et sustentabilidade komunal, kuda fi’ar-an atu ema ida-idak iha kbiit bele hatudu sira nia matenek husi laran, ha-konu ema nia kreatividade; kreatividade emar nian, ekonomia nian, sosial nian no bele mos politika nian.

OBJETIVU ESTRATEZIKU ORGANIZASAUN

1. Hasae asesu muziku Timor Leste ba formasaun no informasaun iha area muzika nian iha Timor Leste
2. Loke espasu ba muziku sira hodi bele espresa sira nia matenek no talentu
3. Harmoniza relasaun entre muziku Timor Leste no muziku rai liur
4. Hasa’e partisipasaun povu no governu atu suporta dezenvolvimentu muzika iha Timor Leste
5. BFR mos sei servisu atu kontribui hodi proteje no defende direitus intelektuais no propriedades husi obra muzikus sira nian no luta hasoru hahalok plagiarism (pembajakan) iha Timor Leste.

PROGRAMA NO KREATIVIDADE BFR NIAN

a. Lalais no iha tempu badak

1. Loke studio gravasaun no produsaun álbum muzika (selu) – funsiona tiha ona
2. Organiza workshop (hala’o ona dala ida iha studio BFR nian), seminar no diskusaun publiku no mos treinamentu kona ba muzika nian (instrumentu no knananuk), son nian, no seluk tan, tuir necessidade – (halao tiha ona treinamentu kona ba Sound Engineering ba distritu 13, iha tinan 2014).
3. Oferese asesu gratuitu ba foin-sae tokador sira - lalais no halao tiha ona.

• Hanorin no dezemvolve sira nia talentu iha Arte, hamutuk ho Senhor Soni Wibisono, toka-dor, konpozitor, sound engineer. 
• Kolaborasaun ho grupo sira seluk iha area arte nian, hanesan LUTU, X-Cruz, Arte Moris, Galaxi Band, Natureza Band, Komunidade Klan, Klamar Band, Alkatraz, no seluk tan, hodi organiza atividade nebe fo folin ba interese nasional. BFR tulun no fo tiha ona kontribuisaun konkreta lubuk ida iha aspetu ida nee, liu husi atividade konsertu hirak nebe komemora loron 40 (hamutuk ho TVTL iha palku cresendo), fulan 6 (hamutuk ho UNTL organiza debate publiku iha UNTL-kona ba asuntu nasional liga ho konseitu Maubere, funu nasional) no mos loron Moris Borja da Costa nian (hamutuk ho Dr. Abílio Araújo, Dr. Simão Barreto, Arte Moris, Galaxi Band, Klamar Band, SIN Band), organiza Maliana Rock Festival iha Maliana (nebe tinan ne sei halao iha loron 7 to’o loron 9 fulan Maiu 2015, ba dala-tolu, no sei sai eventu tin-tinan ba BFR).
• Planeia atu halao konsertu ida hanesan iha Distritu Maliana ne, iha distritu tolu (3) seluk tan. Hamutuk ho belun muziku sira husi Maliana no mos belun muziku sira balun husi Dili, iha tinan 2014, BFR afirma no lansa ninia programa anual “Maliana Rock Festival”. BFR hein katak, konsertu muzika sira ne’e sei sai dalan ida atu haburas no habelar interese komunidade nian iha area muzika, no lori foin-sa’e sira hare possibilidade seluk nebe arte no muzika bele kontribui ba prosesu hari Nasaun no Estadu Timor-Leste.

b. Tempu Mediu

1. Loke kursu ka eskola muzika ba foin-sae sira, liu-liu fo prioridade ba labarik sira husi tinan 10 too 23 atu bele aprende kona ba pratika no teoria bazika iha muzika.
2. Loke loja muzika ida nebe apropriadu ba muzika, ho nível standard hodi garantia kualidade       instrumentu moderna nebe atu faan ba komunidade muziku sira iha Timor.

c. Tempu Naruk

1. Sei buka halibur no fasilita artista Timor oan sira bele hetan biban atu bele dada-lia besik-liu-tan ho artista Internasional, hodi fahe no oferese matenek arte nian hodi hatudu oinsa bele uza arte sustenta moris ekonomia nian. Servisu ho artista Indonésia nian ida dadaun ne, mak sinal husi hakarak bot ida ne, ba aban-bain-rua.
2. Ba oin, hanorin no dezemvolve talentu muzika no halo konsertu ba komunidade iha distritu sira hodi anima komunidade.

BFR NIA SUSTENTABILIDADE FINANSIAMENTU

BFR iha ninia-an rasik, nuudar entidade independente, nebe faan ninia matenek iha área arte muzika nian, ho ninia estúdio, ho mos programa loke kursus muzika, loke loja muzika nian, fiar-an katak BFR sei metin no sustein nia-an rasik. Ho nunee, asistensia esterna sei mai tuir envetu nebe nesesariu deit. Funsionamentu BFR nian sei la-kesi-an tomak ba asistensia esterna.