BFR - Berliku Fanu Rai
“Studio Gravasaun Muzika, kursu muzika, Sound Engineering”
Fatin ba kursu Muzika nian, Sentru Muzika no Sound Engineering
Loron diak no rahun kmanek belun muziku no artista sira hotu..
BFR hein katak belun sira hotu iha isin diak, badinas ho ida-idak nia knaar, hakonu moris ho kreatividade nafatin no ho spiritu arte nian.
BFR hakarak apresenta BFR nia blog ida ne’e ba belun artista [muziku sira] hotu, atu nune’e belun sira bele hatene diak liu tan kona ba BFR, no besik liu tan ba BFR. Iha blog ne’e, iha informasaun kona ba saida mak iha BFR, atividade nebe mak BFR halo, ideia hirak nebe mak BFR hakarak atu halo ho belun artista sira iha Timor, no mehi saida deit mak BFR iha, atu kontribui ba arte, liu-liu iha area muzika, ba ita hotu nebe hadomi muzika no arte iha ita nia rai doben Timor-Lorosa’e.
Nu’udar artista Timor oan, ita presiza tulun malu, atu nune’e ita hamutuk la’o ba oin. Fahe hanoin ba malu, atu nune’e ita ida-idak nia matenek kona ba arte bele sai Ita hotu nia hamutuk ba oin, hodi halo arte iha Timor sai diak liu tan ba aban bainrua.
Ho hanoin ida ne’e, iha blog ne’e BFR fo mos oportunidade ba belun sira atu fahe belun sira nia opiniaun, idea, ka buat seluk-tan kona ba arte (laos deit muzika), liu husi artikel. Belun sira bele hakerek artikel kona ba arte, no haruka liu husi e-mail ba BFR, atu nune’e BFR bele posting iha blog ne’e. BFR mos koko halo forum ida, atu ita bele diskuti hamutuk kona ba saida deit mak ita hakarak atu fahe ho belun artista sira seluk. Liu husi ne’e, ita bele konhese malu diak liu tan, no komprende malu diak liu tan. Karik iha biban, liu husi forum haksesuk nian, Ita bele organiza atividade arte muzikal ruma hodi kontribui haburas sidade Dili.
BFR mos hein katak belun sira bele fo “kritika no sujestaun nebe kontribui” ba dezenvolvimentu arte nian, atu nune’e liu husi fourm no blog ida ne, BFR bele fahe belun sira nia matenek no hanoin kritiku sira hodi hariku Ita hotu nia matenek no kbiit kona ba muzika iha Timor-Lorosa'e.
“The ‘EARTH’ without ‘ART’ is just ‘EH’”…..
Hakoak bot ba belun artista sira hotu…
No comments:
Post a Comment